FNP Menameradiel

21 oktober 2011

Bêste Minsken,

Yn de riedsgearkomste fan tongersdei 27 oktober 2011 de jûns om 8 oere yn it gemeentehûs komt by punt 11 fan de wurklist oan ’e oarder:
“Voorstel tot onttrekking aan het openbaar verkeer en overdracht naar een particulier van een weggedeelte van 600 meter van Nijlânsdyk ten noordoosten van Bitgummole.”

Boargemaster en wethâlders stelle de ried foar om sa te beslúten:
“Op grond van artikel 9 van de Wegenwet tot het onttrekken aan het openbaar verkeer van het gedeelte Nijlânsdyk ter hoogte en ten oosten van het geplande tracé van het Noordwesttangend vanaf de driesprong met de zuidelijke wegaansluiting( Nijlânsdyk) tot aan het einde van de weg ter hoogte van de westzijde van de doorsnijding van het Noordwesttangend, over een lengte van ca 600 meter.”
Dit soe betsjutte dat in slach om,”een ommetje” yn it Nijlân sa’t dat altiten dien waard fan ’e baan is.

De FNP is it út noch yn net iens mei de gong fan saken.
In pear punten.
De oerienkomst tusken Binnema BV en de provinsje fan 23-11-2006 is net rjochtmjittich en dêrom net rjochtsjildich.
Want, de kolleezjeleden fan doe, de hearen Dijkstra en Pen hiene yn novimber 2005 it ôfsluten fan de Nijlânsdyk al ferkwânsele oan de provinsje, wylst hja dêr net it foech ta hiene: Op grûn fan de Wegenwet 1930 hie de gemeenteried dêr doe oer beslute moatten !

Yn it foarstel fan B enW is neat werom te finen fan de tasizzing fan de provinsje, dien op ’e ynformaasjejûn te Bitgummole fan 7-6-2010, dêr’t jimme manmachtich oanwêzich wiene: ”Hear Visser (projektlieder NWT fan de provinsje) geeft een toelichting op de voetgangersoversteek op de Nijlânsdyk.
Dit was een verzoek van Pleatslik Belang Bitgummole om het bestaande ommetje in stand te houden. Een voetgangersoversteek op een dergelijke weg is niet gebruikelijk, maar de provincie is van plan medewerking te verlenen aan het verzoek.”
Hy liet sels in dia mei in foarbyld fan san oerstek sjen.

Wat is der dien mei de ynbring fan de ynsprekkers yn de riedsgearkomste fan 17 maart 2011 en de mear as 150 hantekeningen ynlevere fan minsken dy’t tsjin de ôfsluting binne ?

Ynwenners fan Bitgummole e.o .
Minsken tinke net gelyk en dat is ek mar moai.
Binne der guon fan jimme dy’t it net iens binne mei it foarstel fan B en W? Dan is der in mooglikheid om dat kenber te meitsjen troch no ek manmachttich oanwêzich te wêzen en of yn te sprekken op’e riedsgearkomste fan 27 oktober. By ynsprekken moatte jimme dat al efkes 48 oeren fan te foaren trochjaan op it gemeentehûs : 0518- 452925.

It like ús in goede saak ta om jimme sa efkes by te praten.
Fraksje en bestjoer
FNP-Menameradiel.

We hawwe ôfrûne wike lêze en hearre kinnen oer de sitewaasje rûnom de mooglike úttreding fan Kollumerlân en Dantumadiel út Omrin.

Oft it wier is krije se elts fiif jier lang € 100.000,- fergoeding en binne se gjin oandielhâlder mear. Dat betsjut dat dy twa gemeenten ek gjin risiko mear rinne en de oerbliuwende gemeenten dus mear. Se leverje wol it offal yn dy fiif jier mar dan binne se der ek ôf. Dat is al mei al de omkearde wrâld liket my. Ik ha dêr soargen oer en bin benijt hoe oft it kolleezje hjir oer tinkt.

Berltsum
De FNP-fraksje hat nei oanlieding fan fragen út de buert wer fragen stelt oer de sitewaasje om de radiografysk bestjoerbere auto’s hinne by Japero yn Berltsum. Der leit in útspraak fan de rjochtbank dat it net mear mei en freget hoe’t kolleezje hjir mei omgiet. It kolleezje wol dat Japero him oan de wet en rigeljouwing hâldt en sil net-fergunde aktiviteiten net ta stean.

Bitgum
De FNP-fraksje hat net ynstimd mei it útstel fan it kolleezje oangeande de oanfraach foar in nije riidstal foar gehandikapten oan de Bitgumerdyk 26 (stâl Wolbers). De wegeringsûnderbouwing fan mooglike presedintwurking, sitewaasje dochter, bouwe yn iepen gebiet en wenbestemming doge neffens de FNP net.

Slappeterp/Skingen
Minister Verhagen wol wer mear en/of langere sâltwinning tastean oan ESCO/Frima sâlt yn Harns (put Barradiel II). Ek it boarjen yn de mooglik nije lokaasje by Slappeterp is noch net fan de baan.
De FNP fraksje is poer tsjin de sâltwinning ûnder lân. Wêr dan ek. Der ûntstiet skea oan wenningen en pleatsen mar der kin ek fersilting yn it grûn- en opperflaktewetter optrede. De skeaderegeling is ek te gek foar wurden. Der wurdt neat útbetelle om’t der noch net genôch fersakking is.
De FNP hat ienriedich mei de oare fraksjes it kolleezje frege om mei alle ynstânsjes safolle mooglik mei ien mûle te praten en in dúdlik synjaal oan Minister Verhagen ôf te jaan.
De Rie fan Menameradiel sil in ienriedige moasje yntsjinje wêrnei’t it kolleezje it antwurd fan de Rie fan Menameradiel oerbringe sil.

Moasje byldbepalende lokaasjes

De FNP-fraksje hat yn oparbeidzjen mei de FNP-tinktank in moasje yntsjinne oangeande de beskerming fan “byldbepalende lokaasjes”.

Menameradiel hat allinnich Ryksmonuminten en 2 beskerme doarpsoansichten, wylst der noch safolle oare moaie lokaasjes binne dy net beskerme binne tsjin ferdwinen. It giet dan net allinich om monuminten of byldbepalende gebouwen, mar ek om bysundere lokaasjes bûten de beboude kom, lykas in bysûndere hikke of sleat mei op de eftergrûn in âlde beam, âlde skuorre ensafuorthinne. De FNP wol dat der in ynventarisaasje komt wêrby’t de doarpen in belangrike stim krije.

De hiele Rie hie wurdearring foar de moasje en sjocht it belang ek wol mar is bang foar de kosten. De FNP-fraksje hat de moasje oanhâlden om de kosten better yn byld te bringen. Foarop steit dat it de boargers net folle kostje mei. Ynkoarten komt de fraksje mei neiere ynformaasje wêrnei de moasje op en nij behannele wurdt.

De FNP fraksje hat yn de lêste twa riedsgearkomsten in grut oantal fragen oan it kolleezje steld en yn gearwurking mei oare partijen amendeminten en moasjes yntsjinne. Dat hat it noadige opsmiten.

Riedsgearkomste fan 16 juni 2011.
De gearkomste fan 16 juni 2011 gie oer de kadernota 2011, mei opmaat nei 2012 en besunigings (ombûgings). Troch de FNP, Grien Links en PvdA binne amendeminten yntsjinne om troch it kolleezje yntsjinne besunigings op subsydzje oan doarpsbelangen, de Wurkgroep Untwikkelingsgearwurking Menameradiel (WOM), it Tomke projekt, “Uurcultuur” en de Afûk foar te kommen.
De besunigings op it Tomkeprojekt (de FNP, PvdA, Grien Links, CDA wiene foar en GB en VVD tsjin) en de WOM (foar: FNP, PvdA, Grien Links, CDA, GB en tsjin de VVD) binne dêrtroch weromdraaid. Gemeentebelangen, VVD, en CDA hawwe it ôfskaffen fan de sudsydzje oan Doarpsbelangen, Uurcultuur en de Afûk stipe. De VVD hat gjin inkeld amendemint stipe. De boargers yn Menameradiel moatte harren sels mar rêde.

In wichtich punt wie ek de bibleteek. De FNP wie tsjin de besuniging fan € 100.000. Wy fine de helte it absolute maksimum, want dêrmei kin it bibleteekwurk trochgean. Uteinlik is de besuniging opdield oer twa jier, mei de tasizzing fan it kolleezje dat der goed sjoen wurde sil nei de wize wêrop, en op hokker ûnderdielen it bibleteekwurk (Lytse Biebs) dochs behâlden wurde kin.
De FNP hat ek in moasje fan VVD en Grien Links stipe, dêr’t yn frege wurdt, dat it kolleezje ûndersyk docht nei de finansjele sitewaasje fan it âlde gemeentehûs om te sjen hokker maatregels der nommen wurde kinne om de kosten (€ 100.000,=) te ferleegjen. De FNP hat mei Grien Links en PvdA in moasje yntsjinne mei de opdracht oan it kolleezje in ûndersyk te dwaan nei de effisjinsje fan it gemeentlik apparaat. It fersyk om ûndersyk nei it âlde gemeentehûs hat it helle, dat nei it gemeentlik apparaat net. De koalysjepartijen VVD, Gemeentebelangen en CDA wiene tsjin.

De FNP hat wethâlder Pen witte litten it in kwealike saak te finen, dat it kolleezje € 10 miljoen euro liend hat, sûnder de Rie dêr foarôf oer te riedplachtsjen. Dat hie op grûn fan de Gemeentewet wol moatten. De FNP wie foarnimmens in “moasje fan treurnis” – in soarte fan giele kaart – yn te tsjinjen, mar hat dit net dien om’t de wethâlder syn ekskuses oanbean hat. Wy krije fan him noch wol antwurd op de fraach fan 18 maaie hoe’ t yn in tiid fan besunigings de jierlikse lêsten fan € 820.000,= (!) op ‘t kleed komme moatte en ferantwurde wurde.

Riedsgearkomste fan 9 juni. De FNP hat dêryn ûnder oare de folgjende fragen steld:

- It hânhavenjen fan it ôfbrekken fan de âlde kassen by Hooiveld oan de Moddergatsreed. Wethâlder Pen hat oanjûn dat der ynkoarten aksje komt.

- Der binne nije bushaltes kommen oan de sutelwei neist de S-10 nei Bitgum. De FNP fynt dat frjemd, mar benammen hiel gefaarlik, omdat aansens ek de grutte bussen fan tsjinst 71 dêrtroch fan dizze 60-km dyk en tagelyk drok fytspaad gebrûk meitsje sille.

Wethâlder van Asperen joech oan dat dit mei provinsje, kasseûndernimmers en busmaatskippij bepraat is. Der moast in busopstapplak komme om de wurknimmers yn de kassen op in gaadlike wize ferfiere te kinnen. It past neffens de wethâlder yn it plaatsje fan ferkearsfeiligens fan de provinsje. Wy betwivelje dat.

- De fraach is steld wêrom der yn Berltsum tastimming jûn wurdt foar de bou fan in nije wenning op de hoeke fan de Van der Slikkeleane en Boomsmastrjitte. Dit is in pear jier lyn noch ôfwiisd. Ek is it frjemd dat it bart wylst der noch net iens boud wurdt op de Pôlle. Wethâlder Pen seit dat it giet om “ynwreiding” en der de lêste tiid mear wennings yn it doarp boud binne. Tiden feroarje. Reaksje FNP: Dy oare wenten binne boud op “eigen grûn”. Yn dit gefal giet it om gemeentegrûn. Presedintwurking?

- De FNP hat frege om te sjen oft de opslach fan feefoer en masines yn de gemeentlike berm by Wolbers oan de Beltsumerdyk ûnder Bitgum tastien is, of wurde kin. Wethâlder Pen en Van Asperen sizze ta hjir nei te sjen.

Behanneling punt 8 fan de Wurklistpunt oer in ekstra krediet fan € 670.000,- foar rioelearringswurk yn Dronryp.
De FNP fûn it frjemd dat al nei 40 jier ferfangende rioelearring nedich is, wylst foar ôfskriuwing 60 jier stiet. It docht net bliken dat de rioelearring tenein is. Wethâlder Pen jout oan dat it dien wurdt om’t der ek oare dykwurksumheden plakfine. Wurk mei wurk meitsje. De FNP is it  yn prinsipe my dy sjochwize iens, mar fynt it no fiersten te betiid. Yn dy 20 jier kinne wy it jild better op de bank sette en € 350.000,- oan rinte opstrike. De FNP stie allinne en it útstel giet troch.

Riedsgearkomste fan 8 juli oansteande:
De FNP sil in moasje yntsjinje oer byldbepalende lokaasjes yn de gemeente Menameradiel. Doel is om monuminten of bysûndere lokaasjes en harren omjouwing te bewarjen. As it stipe wurdt betsjut it dat alle (bou)aktiviteiten hifke wurde moatte oan dizze lokaasjes. De doarpen kinne sels de lokaasjes oanjaan.

Oant safier dit bypraten fan de fraksje.

Mei groetnis,

H.F. (Rikus) Sinnema

Berltsum, 25 novimber 2010

Fragen fan de FNP fraksje oan it Kolleezje.

1. Der hawwe al inkelde mini sympoasiums west oer “Fryslân jout enerzjy”. It docht bliken dat in soad oare gemeenten gâns mear dogge op it mêd fan duorsumens as Menameradiel.
Millennium doelstellingen en jild foar duorsumens binne gruttendiels skrast op de begrutting. De provinsje stelt ynkoarten nije fûnsen beskikber.
Wethâlder Van Asperen hat der ek west en wy wolle graach witte oft it kolleezje ek fan betinken is dat ús gemeente no ek mear dwaan moat.

2. De NWT sil sa’t it liket yn it kommende jier oanlein wurde. No troch it regear oanjûn is dat fleanbasis Ljouwert op net al te lange termyn miskien ticht giet komt de fraach wer op oft it ferstannich is om de oanlis op dizze wize troch te setten. De lanningsbaan leit der al en troch dizze te brûken en oan te slúten op de Westergowei skeelt it in soad jild en bliuwt it lânskip yn takt. De fraach is oft it Kolleezje de provinsje hjir ynkoarten nochris oer hifkje wol hoe oft se der yn steane.

3. Fierders de fraach oft der al sifers bekend binne oer de ferkearsyntinsiteit.

4. Yn Bitgummole hat bliken dien dat bewenners de krúsing mei de Westergowei gefaarlik fine. Der barre nochal wat ûngelokken. De FNP is op de hichte mei de oanlis fan de NWT en de maatregels foar dit krúspunt mar omt it noch lang duorje kin en ek noch wol wizigje kin, soe it nei ús betinken goed wêze om minimale mar feilige oanpassings te dwaan, bygelyks de snelheid beheine ta 60 km/oere. De fraach is oft it kolleezje de provinsje freegje wol om hjir nei te sjen. As foarbyld kin it krúspunt Koekoeksleane/Achtepaed yn Berltsum tsjinje.

5. Kin it kolleezje ús op de hichte stelle fan de baggeroanfier by Skatzenburg? Slib wurdt oanfiert op snein en dat is frjemd. En wat foar klasse hat it slib?

6. It kolleezje hat ús yn de leste riedsfergadering op de hichte brocht fan de kar foar de bredeskoalle lokaasje yn Berltsum. De kar derfoar ha wy lêze kinnen yn it B&W beslút en yn it parseberjocht. Der is al wat opskuor fan buorlju rûn de skoalle. De FNP hat wat noed oer de wize fan it jaan fan ynformaasje oan boargers oer de kar. It moat net sa wêze dat de gemeente blunders makket troch ferkearde, ûnjuste of te minne ynformaasjeferstrekking. Wy wolle it kolleezje graach op dizze saken wize en sjogge mei belangstelling nei it riedsfoarstel út.

7. Út ynformaasje fan de webside www.MBC-friesland.nl docht bliken dat der snein wer in wedstriid fan radiografysk bestjoerbere auto’s komme sil op it terrein fan Japero. Wat docht it kolleezje hjir oan ?

It nijsbrief fan FNP Menameradiel, nûmer 2, oktober 2010

Bêste ynwenners fan Menameradiel,

De FNP lit, sa as jimme wend binne, wer fan har hearre.
De nije rie is ynstallearre. Freark Siegersma en Rikus Sinnema binne as FNP fraksje fol moed begongen oan in perioade yn de opposysje. It útgongspunt is sa folle mooglik gearwurking sykje mei de oare fraksjes om sa folle mooglik foar de gemeente betsjutte te kinnen.

It bekende FNP-lûd fan behâld fan taal, natuer, kultuer en plattelân bliuwt boppe oan de list stean. Yn de takomst sil wol it ien en oar feroarje yn de wize fan it bringen fan ús boadskip. It Frysk bliuwt ús skriuw -en fiertaal mar ek it Nederlânsk sil hjir en dêr foar ús net-Frysktalige stiper te sjen wêze yn ús ynformaasje.

Op it stuit binne der in soad saken dy’t spylje.

• De Noard West Tangent sil oanlein wurde. De FNP-fraksje hat him swier tsjin de iensidige oanpassings, mar der wie gjin mearderheid yn de rie. It hjoeddeiske kolleezje hat mei stipe fan harren fraksjes ( Gemeente Belangen, VVD en CDA) it foarelkoar krigen om troch te gean mei de proseduere.

• De kadernota is koartlyn besprutsen en oannommen. De FNP fraksje hat noed foar de besunigings dy’t der barre moatte, mar fynt dat de koalysjepartyjen (GB, VVD en CDA) wol hiel maklik tinke oer inkele saken, sa as:
- Stypjen fan de bidriuwe kontaktdagen, dêr wolle se net folle mear oan dwaan. De FNP fynt dat de gemeente it foarbyld jaan moat oan de bidriuwen yn dizze minne tiid.
- Oan miljeu wurdt ek net folle mear dien. De FNP fynt dat de miljeuplannen fan de ôfrûne jierren troch gean moatte en dêr net op besunige wurde moat.
- GB, VVD en CDA hawwe rom € 500.000,- oer foar de oanlis fan in keunstgersfjild en oanpak fan in trainingsfjild op Schatzenburg. Oare fuotbalfjilden yn de gemeente hawwe it neisjen. De FNP fûn dat as der jilden frij makke wurde kinne, dy ferdield wurde moatte. Dan wiene mear klubs tefreden west mei in trainingsfjild fan keunstgers.
- GB, VVD en CDA woene oer de Brede Skoalle yn Berltsum foar de behanneling fan de kadernota noch in beslút nimme. Der wie mei alle fraksjes ôfpraten dat de Brede Skoalle yn Berltsum ekstra finansjele stipe hawwe soe. De kadernota is yntusken behannele mar der is noch gjin inkeld beslût nommen en ek de ekstra finansjele stipe is net tasein. De FNP kin hjir net folle begrip foar opbringe en wol op koarte termyn dúdlikheid.

• De FNP set him yn foar de oanlis fan ekstra foarsjennings oan de âlvestêdefarrûte yn Wier foar de lokale en takomstige rekreaasjeskipfeart.

• De FNP hat lykas de oare partyen foar in fierdere gearwurking mei de Middelseegemeenten stimd. De gearwurking jout ús mear earmslach yn ekspertise om de gemeentelike taken oan te kinnen. Foar de FNP bliuwt selstannichheit fan Menameradiel foarop stean. Fúzjes, yn hokker foarm dan ek, binne no net besprekber.

• De FNP stiet noed foar it gebiet om Nieuw Stroomland by Ritsumasyl en Deinum hinne. De FNP sil hjir sa folle mooglik oanstjoere op een goeie lânskippelike ynpassing, griene iepenheid en goede ûntslúting fan de doarpen.

• De FNP hâldt harren byienkomsten meastentiids op in lokaasje yn in doarp. Wy wolle tichteby de boargers wêze en wy merke dat dit wurdearre wurdt. De besiken binne goed. Jo komme dochs ek !!!!

PvdA deputearre út de bocht mei krityk op Fryske plattelânsgemeenten.

De FNP is fan betinken dat Konst hjir finaal út de bocht flein is. Neffens wurdfierder Annigje Toering hâldt Konst him net oan it stânpunt fan it Kolleezje fan Deputearre Steaten. ‘It Kolleezje hat nota bene sels finansjele stipe jûn oan de Middelsee foar de fersterking fan de bestjoerskrêft. Dan kin in deputearre net sa mar roppe dat deselde gearwurking ‘onzinnig’ is.

De Steatefraksje fan de FNP stelt skriftlike fragen oan deputearre Hans Konst oer syn swiere krityk op de Middelseegemeenten. Konst neamde op in byienkomst yn Ljouwert de gearwurking fan Menameradiel, Ljouwerteradiel, It Bildt en Ferwerderadiel ‘onzinning en onverstandig’. Hy hie it ek oer in blokkade fan de gearwurking troch de Provinsje en stelde fraachtekens by de selsstannichheid fan Littenseradiel.

De FNP is fan betinken dat Konst hjir finaal út de bocht flein is. Neffens wurdfierder Annigje Toering hâldt Konst him net oan it stânpunt fan it Kolleezje fan Deputearre Steaten. ‘It Kolleezje hat nota bene sels finansjele stipe jûn oan de Middelsee foar de fersterking fan de bestjoerskrêft. Dan kin in deputearre net sa mar roppe dat deselde gearwurking ‘onzinnig’ is. Wy kenne de PvdA deputearre as in man dy’t oars goed neitinkt foardat er wat seit. Dit falt ús as FNP bot ôf.’

Toering freget fierder oft de PvdA deputearre faaks yn it Kolleezje in minderheidsstânpunt ynnaam hat. Boppedat wiist de FNP wurdfierder der op dat bestjoerskrêft Konst syn portefúlje hielendal net is: ‘Konst set hjir de plattelânsgemeenten mei noch swierdere wurden bestjoerlik yn de kjeld as de portefúljehâlder Galema fan it CDA’.

De FNP freget no oft kolleezjefoarsitter Jorritsma yngripe wol om foar dúdlikheid te soargjen oer it stânpunt fan it Kolleezje fan DS: ‘Sa geane jo net mei elkoar om. De útlittingen fan Konst soargje foar grutte bestjoerlike ûnrest..’

Tongersdei 7 oktober hawwe de Middelsee gemeenten tagelyk riedsgearkomsten hâlden mei as ûnderwerp it yntensivearjen fan de gearwurking tusken Menameradiel, Ljouwerteradiel, it Bildt en Ferwerderadiel. Njonken de opsjes ja of nee lei der ek in ammendemint fan de PvdA om net yn te stimmen mei de útwrydske finansjele konsekwinsjes. De útwurking fan de gearwurking yn dit foarstel kostet namtlik struktureel € 47.205,-.

Utgongspunt foar de FNP is selsstannigens as gemeente en mearwearde as betingst by in gearwurking. Dat lêste wurdt neffens Freark Siergersma al dreger as it hegere kosten opsmyt.

“As we de aksjes fan it provinsjebestjoer sjogge is it dúdlik dat der neffens har wis wat feroarje moat: “sûnder gearwurking of fúzje gjin takomst”. De FNP yn Menameradiel kiest dan foar gearwurking. Yn Middelsee ferbân want dy trein rydt al.”

Nei in tasizzing fan sawol de boargemaster as ien fan de wethâlders om de nije funksje fan ynkeaper ter diskusje te bringen hat de rie ynstimd mei it foarstel. Ek it foarstel om allinnich ynfestearrings te dwaan dy’t maklik werom te draaien binne hie it kolleezje wol earen nei.

Yn Ferwerderadiel hat de rie ek beswier tsjin de hegere kosten, mooglik spilet dêr in dochs al wat negativer sentimint by de gearwurking wol in gruttere rol. We binne benijd hoe’t it komt.